نسخة من الكتاب المقدس في ترجمته الإيطاليّة باسم الكتاب المقدس الفرنسيسكانيّ [BIBBIA FRANCESCANA]
الكتاب المقدس هو أساس حياة المكرس سواء راهب أو كاهن.. والقديس فرنسيس مؤسس الرهبنة الفرنسيسكانيّة في العالم في بداية تأسيس الرهبنة أعلن أن حياتنا هي أننا نعيش إنجيل ربنا يسوع المسيح.. وكتب قانون الرهبنة عبارة عن مجموعة من الاقتباسات عن الكتاب المقدس.. ومن القصص الجميلة عن عمق محبة أخونا الأكبر القديس فرنسيس للكتاب المقدس إنه في مرّة من المرات في بداية نشأة الرهبنة كان مع رفاقه الأوائل وكانوا لازم يتفرقوا لبعض الوقت في أماكن مختلفة للوعظ.. لكن كانوا لا يملكوا سوى نسخة واحدة وحيدة من العهد الجديد للكتاب المقدس.. ففي حركة روحيّة ممكن نوصفها إنها فعل نبويّ من القديس فرنسيس.. بدأ فرنسيس يوزع ورقة ورقة من كتاب العهد الجديد على كل واحد من الإخوة وقالهم كل واحد فيكم يحفظ الورقة اللي معاه ويدرسها ويتأمل فيها.
عشان كده الرهبنة الفرنسيسكانيّة من حوالي 8 سنين عملت نسخة من الكتاب المقدس في ترجمته الإيطاليّة باسم الكتاب المقدس الفرنسيسكانيّ [BIBBIA FRANCESCANA] وهي عبارة ترجمة إيطاليّة لأسفار الكتاب المقدس مع حواشي وتعليقات قصيرة في مساحات خاصة في المتن من كتابات القديس فرنسيس الأسيزيّ والقديسة كلارا.. وبكده بيوفر للراهب والراهبة الفرنسيسكانيّة النصّ المقدس في ضوء روحانيّة مؤسسي الرهبنة بشكل جميل جدًا ورائع.
عشان كده فكرت أبدء أكتب كلّ فترة بوستات من الكتاب المقدس الفرنسيسكانيّ [BIBBIA FRANCESCANA] من الحواشي والتعليقات الفرنسيسكانيّة اللي موجوده بين الأسفار.. لأن حقيقيّ فيها جمال وروعة ورؤية جديدة بالنسبة لينا كمسيحيين شرقيين عاشوا وكبروا على الشكل التقليديّ للكتاب المقدس.. ففرصة نشوف الكتاب المقدس بعيون مختلفة.. عيون فرنسيس وكلارا.
Toutes les réactions :
22Lukas Sawarsan, Paolino Ofm et 20 autres personnes
